د علمي شورا نوبتي غونډه ترسره شوه

د علمي شورا نوبتي غونډه ترسره شوه.
د افغان نړیوال اسلامي پوهنتون د علمي شورا نوبتي غونډه د پوهنتون د سرپرست رئیس، محترم پوهندوی دوکتور رفیع‌الله عطاء صاحب په مشرۍ، د ریاست مقام په تالار کې ترسره شوه. 
په غونډه کې د پوهنتون د معاونیتونو مرستیالانو، د پوهنځیو رئیسانو او اړوندو مسؤولینو ګډون کړی و.
په دې علمي غونډه کې د پوهنتون د پرمختګ او لاسته راوړنو په موخه د تېرې غونډې پرېکړو د تطبیق راپورونه وړاندې شول. همدارنګه د عملي زده کړو د لا پیاوړتیا لپاره د لابراتوارونو فعاله کېدو، د نظري زده کړو تر څنګ د عملي زده کړو او څېړنېزو فعالیتونو د پراخېدو، د استادانو د حضوري تدریس د دوام، د کلنیو او ۲۰ فیصده آزموینو لپاره د مشخصو نېټو ټاکل، او ورته موضوعاتو په اړه تفصیلي بحث وشو.
په غونډه کې د پوهنتون د شته ستونزو د حل، د لا پرمختګ، د څېړنیزو او علمي فعالیتونو د پراخوالي او د محصلینو لپاره د زده کړو د کیفیت د لوړوالي په هدف یو شمېر کمېټې هم تشکیل شوې.
د افغان نړیوال اسلامي پوهنتون مشرتابه ژمنه وکړه، چې د پرمختګونو د دوام او ستونزو د حل لپاره به له رهبرۍ سره منظمې او دوامداره ناستې ترسره کېږي، څو د زده کړو کیفیت او اداري چارې لا اغېزمنې شي.
د نشراتو او عامه اړیکو آمريت