د افغان نړیوال اسلامي پوهنتون جدیدالشمول محصلانو ته د ښه راغلاست او د دغه پوهنتون ممتاز محصلانو د ستایلو غوڼده تر سره شوه
د افغان نړیوال اسلامي پوهنتون جدیدالشمول محصلانو ته د ښه راغلاست او د دغه پوهنتون ممتاز محصلانو د ستایلو غوڼده تر سره شوه، چې د افغان نړیوال اسلامي پوهنتون رئیس پوهندوی دوکتور رفیع الله عطاء، د معاونیتونو معاونینو، پوهنځیو رئیسانو، استادانو او محصلانو ګډون کړی وه.
د پوهنتون رئیس ښاغلي پوهندوی دوکتور رفیع الله عطاء ممتاز او جدیدالشمول محصلانو ته د مبارکي او ښه راغلاست تر څنګ د علم په ارزښت او اړتیا وینا وکړه.
پوهندوی دوکتور رفیع الله عطاء وویل، چې په علم سره کولای شو خپل هېواد او دین ته خدمت وکړو هغه زیاته کړه، چې اوس په هېواد کې د علم تر سره کول لپاره ښه زمینه برابره شوې ده نو تاسو محصلان باید خپل هدف ته کار وکړي، چې هغه د هېواد پر مختګ او آبادې سربېره په هر برخه کې پر ځان بسیا کول دي تر څو هېواد مو له نورو پر مختللو هېوادونو سره سیال کړو.
د غونډې په جریان کې د محصلانو چارو مرستیال شیخ عبدالمالک نیازي له خوا نویو راغلو محصلانو ته د پوهنتون پیژندنې په موخه د پوهنتون اکاډومیک چاپېریال تر عنوان لاندې پریزنټیشن هم وړاندې شو.
ورته مهال د محصلانو په نماینده ګۍ د شرعیاتو پوهنځي یو تن محصل پوهنمل حکمت الله حکمت د پوهنتون له رهبري او استادانو څخه مننه وکړه، چې له دوی سره نه ستړې کېدونکي هلې ځلې کوي او وویل، چې په افغان نړیوال اسلامي پوهنتون کې د زده کړو لپاره ورته هر ډول اسانتیاوې برابرې شوي او د دوی ستونزو ته پر وخت سره رسېدنه کېږي.
حکمت الله حکمت پر نورو تازه د لېسانس په کچه فارغ شوو محصلانو غږ وکړه، چې په کور دننه هېواد کې د ماسټري او دوکتورا تر کچې زده کړې وکړي.
د یادولو وړ ده چې افغان نړیوال اسلامي پوهنتون په پام کې لري، چې په نږدې راتلونکې کې د طب، شرعیات، انجنیري او زراعت پوهنځیو تر څنګ د کمپیوټر ساینس پوهنځی هم ایجاد کړي، تر څو په دغه برخه کې د ماسټري او دوکتورا تر کچې پورې هېوادوالو ته د زده کړو تر سره کولو زمېنه برابره کړي.
