د هوا د ککړتیا عوامل او حل لارو تر عنوان لاندې علمي سیمینار ترسره شو.
د هوا د ککړتیا عوامل او حل لارو تر عنوان لاندې علمي سیمینار ترسره شو.
نن دوشنبه، چې د ۱۴۰۴ هـ.ش کال د مرغومي له ۱۵مې نېټې سره سمون خوري، د افغان نړیوال اسلامي پوهنتون د علمي چارو معاونیت لخوا، د "هوا د ککړتیا عوامل او حل لارې" تر عنوان لاندې علمي سیمینار وړاندې شو.
یاد سیمینار د پوهنتون د بېلابېلو پوهنځیو د رئیسانو، استادانو، اداري او خدماتي کارکوونکو په حضور کې د پوهنتون د غونډو په عمومي تالار کې وړاندې شو.
د سیمینار په پیل کې د علمي چارو مرستیال، پوهنوال ډاکټر عبدالواحد لیاقت، د ګډونوالو هرکلی وکړ او د هوا د ککړتیا د منفي اغېزو او د هغې د مخنیوي پر لارو چارو یې خپله ارزښتناکه وینا وړاندې کړه.
ورپسې، د زراعت پوهنځي رئیس، پوهنوال ډاکټر حمیدالله یونسې، د "هوا د ککړتیا عوامل او حل لارې" تر عنوان لاندې خپل تفصیلي علمي پریزینتېشن وړاندې کړ، چې پکې یې د هوا د ککړتیا اساسي لاملونه، علمي تحلیل، او د حل لارې په دقیق ډول وڅېړلې.
د غونډې په پای کې د ګډونوالو لپاره د پوښتنو او بحث برخه ځانګړې شوې وه، چې پکې ګډونوالو خپلې پوښتنې مطرح کړې او ښاغلي ډاکټر یونسې ورته هر اړخیز او قناعت بښونکي ځوابونه وړاندې کړل.
د یادونې وړ ده، چې افغان نړیوال اسلامي پوهنتون د چاپېریالي پوهاوي او د هوا د ککړتیا د مخنیوي په موخه، له دې وړاندې بېلابېل سیمینارونه او خبرتیاوې خپرې کړي او لا به خپلو هڅو ته دوام ورکوي.
د نشراتو او عامه اړیکو آمریت
