بسم الله الرحمن الرحیم

“د علم، پوهې او څېړنې درنو مینه ‌والو! السلام علیکم ورحمة الله و برکاته! افغان نړیوال اسلامي پوهنتون د هېواد د لوړو زده‌ کړو په ډګر کې یو علمي او تخصصي نهاد دی، چې اساسي موخه یې د ماسټرۍ او دوکتورا په کچه د متخصصو او مسلکي علمي کادرونو روزنه، د علمي څېړنو پیاوړتیا او د ټولنې د اړتیاوو په رڼا کې د لوړو زده‌ کړو پراختیا ده. پوهنتون هڅه کوي، چې د اسلامي ارزښتونو، معاصرو علمي مېتودونو او نړیوالو معیارونو په رڼا کې د تدریس او څېړنې لپاره مناسب چاپېریال رامنځته کړي. اوس مهال افغان نړیوال اسلامي پوهنتون د طب، انجنیرۍ، زراعت، کمپیوټرساینس او شرعیاتو په برخو کې پنځه پوهنځي لري، چې د متخصصو کادرونو په روزنه او د هېواد د علمي پرمختګ په برخه کې مهم رول لوبوي. زموږ باور دا دی، چې د یو علمي نهاد بریا د تدریس په کیفیت، علمي څېړنو، د استادانو په مسلکي وړتیاوو او د محصلانو په علمي لاسته ‌راوړنو پورې تړلې ده.  له همدې امله، د استادانو د ظرفیت لوړول، د څېړنیز فرهنګ پیاوړتیا، د علمي همکاریو پراختیا او د تحصیلي پروګرامونو معیاري کول زموږ له مهمو لومړیتوبونو څخه دي. د افغان نړیوال اسلامي پوهنتون ژمن دی، چې د علمي کیفیت د لوړولو، د نوښتونو هڅونې او د متخصصو کادرونو روزنې له لارې د هېواد لوړو زده ‌کړو په پرمختګ کې اغېزمنه ونډه واخلي. په پای کې، د پوهنتون له ټولو استادانو، اداري کارکوونکو، محصلانو او علمي همکارانو څخه مننه کوم، چې د دې علمي نهاد د موخو د تحقق لپاره هڅې کوي.  هیله لرم، چې د ګډ کار، علمي ژمنتیا او دوامدارو هڅو په مټ د هېواد د علمي پرمختګ او د ټولنې د هوساینې لپاره لا ډېر خدمت وکړو. والسلام ”