د لوړو زده کړو وزارت علمي معین د افغان نړیوال اسلامي پوهنتون څخه لیدنه تر سره کړه.
د لوړو زده کړو وزارت علمي معین د افغان نړیوال اسلامي پوهنتون څخه لیدنه تر سره کړه.
د لوړو زده کړو وزارت علمي معین شیخ الحدیث ضیاءالرحمن مدني له مل پلاوي سره یوځای د افغان نړیوال اسلامي پوهنتون څخه لیدنه وکړه او د پوهنتون له رهبرۍ او استادانو سره یې مشورتي ناسته ترسره کړه.
په دې ناسته کې د لوړو زده کړو وزارت علمي معین شیخ ضیاءالرحمن مدني د پوهنتون له روان وضعیت څخه خوښي څرګنده کړه، او د پوهنتون استادانو ته په وینا کې وویل، چې استادان د ټولنې د ملا د تیر حیثیت لري، او په ځانګړې توګه په داسې علمي بنسټ کې چې د ماسټرۍ او دوکتورا ګڼ شمېر برنامې په کې فعالې دي، د استادانو مسوؤلیت لا زیاتېږي. علمي معین شیخ ضیاءالرحمن مدني له استادانو وغوښتل، چې خپلې دندې په بشپړ مسلکي، علمي او مسوؤلانه ډول ترسره کړي.
همدارنګه د لوړو زده کړو وزارت علمي معین د پوهنتون رهبرۍ له لوري وړاندې شوې ستونزې واورېدې او ډاډ یې ورکړ، چې د حل لپاره به یې اړین اقدامات ترسره شي.
یاده لیدنه د لوړو زده کړو وزارت او افغان نړیوال اسلامي پوهنتون ترمنځ د علمي همغږۍ د پیاوړتیا، د ستونزو د حل او د لوړو زده کړو د کیفیت د لوړولو په برخه کې یو رغنده او مهم ګام بلل کېږي.
دوشنبه ۲۵/۳/۱۴۰۵هـ.ش ۲۹/۱۲/۱۴۴۷هـ.ق
د نشراتو او عامه اړیکو آمریت
