د امرالمؤمنین حفظهالله ورعاه د فرامینو تشریح او په نړیوالو علمي ژورنالونو کې د مقالو معیارونو تر عنوان لاندې علمي سیمینارونه ترسره شول
د امرالمؤمنین حفظهالله ورعاه د فرامینو تشریح او په نړیوالو علمي ژورنالونو کې د مقالو معیارونو تر عنوان لاندې علمي سیمینارونه ترسره شول.
د افغان نړیوال اسلامي پوهنتون د علمي چارو معاونیت اړوند د مسلکي ظرفیت لوړونې عمومي مدیریت په نوښت، دوه علمي سیمینارونه ترسره شول.
یاد سیمینارونه د امرالمؤمنین حفظهالله ورعاه د فرامینو تشریح او په نړیوالو علمي ژورنالونو کې د مقالو د منلو لارې، معیارونه او د جوړښت منطق تر عنوانونو لاندې تنظیم شوي وو، چې پکې د پوهنتون د علمي شورا غړو او د بېلابېلو پوهنځیو استادانو ګډون درلود.
په پیل کې، د علمي چارو مرستیال، پوهنوال ډاکټر عبدالواحد لیاقت د پرانستې وینا ترڅنګ د امرالمؤمنین حفظهالله ورعاه د فرامینو د تدریس او تشریح تر عنوان لاندې تفصیلي پریزینتېشن وړاندې کړ. نوموړي د توشیح شویو فرمانونو له ډلې څخه، د تعزیري جزاګانو فرمان مفصل تشریح کړ.
ورپسې، د شرعیاتو پوهنځي استاد، پوهنوال ډاکټر محمد طاهر ثابت، په نړیوالو علمي ژورنالونو کې د مقالو معیارونه، د منلو لارې او د جوړښت منطق تر عنوان لاندې علمي سیمینار وړاندې کړ. نوموړي د معیاري علمي مقالو د جوړښت، ارزښت، او د نړیوالو ژورنالونو د منلو اساسي اصولو په اړه هر اړخیز معلومات وړاندې کړل.
د سیمینار په پای کې، د ګډونوالو لپاره د پوښتنو او ځوابونو ځانګړې برخه هم ترتیب شوې وه، چې پکې وړاندې کوونکو د ګډونوالو پوښتنو ته قناعت بښونکي ځوابونه ورکړل.
د یادونې وړ ده، چې د افغان نړیوال اسلامي پوهنتون اداره تل هڅه کوي د مختلفو علمي او مسلکي پروګرامونو له لارې د امرالمؤمنین حفظهالله ورعاه فرامین روښانه کړي او د ټولنې اړوندو قشرونو ته یې ورسوي.
د نشراتو او عامه اړیکو آمریت
