د دوکتورا برنامې د لومړي محصل د تیزس دفاع غونډه ترسره شوه.
د دوکتورا برنامې د لومړي محصل د تیزس دفاع غونډه ترسره شوه.
نن شنبه د افغان نړیوال اسلامي پوهنتون د شرعیاتو پوهنځي د قضاء او شرعي سیاست څانګې د دوکتورا برنامې څخه د لومړي ځل لپاره د یو محصل د تیزس دفاع د یوې غونډې په ترڅ کې په بریالۍ توګه ترسره شوه.
د تیزس دفاع په دغه غونده کې د لوړو زده کړو قدرمن وزیر شیخ الحدیث والقرآن مولوي نداء محمد ندیم، د افغان نړیوال اسلامي پوهنتون سرپرست رئیس پوهندوی دوکتور رفیع الله عطاء، د پوهنتون مرستیالانو، دپوهنځیو رئیسانو، د شرعیاتو پوهنځي استادانو او محصلانو ګډون درلود.
د غونډې په پیل کې د افغان نړیوال اسلامي پوهنتون سرپرست رئیس دوکتور رفیع الله عطاء، ګډونوالو ته ښه راغلاست ووایه او د لوړو زده کړو قدرمن وزیر له حضور او دوامداره همکارۍ څخه یې مننه وکړه. نوموړي د شرعیاتو پوهنځي له استادانو څخه هم قدرداني وکړه چې د محصلانو د علمي روزنې لپاره نه ستړې کېدونکې هڅې کوي.
ښاغلي عطاء د شرعیاتو پوهنځي دوکتورا برنامې څخه د لومړي محصل د تیزس دفاع د افغان نړیوال اسلامي پوهنتون، د لوړو زده کړو وزارت او هېواد د علمي نظام لپاره یو مهم او ویاړمن ګام وباله.
ورپسې د دوکتورا برنامې محصل مولوي محمد داوود منصوري د خپل لارښود استاد پوهاند دوکتور مؤمن حلیمي په لارښوونه د (الحقوق الدينية للأقليات في الفقه الإسلامي والقانون الأفغاني) تر سرلیک لاندې د ترتیب شوی تیزس څخه د لږکیو مفهوم، د هغوی حقوق، د طبقه بندۍ معیارونه او ډولونه، د اختلاف معیار، جغرافیایي معیارونه او د نور اړوند موضوعاتو خلاصه وړاندې کړه.
ورپسې د خارجي مناقش پوهنوال دوکتور عبدالله حقیار او د داخلي مناقش پوهنوال دوکتور محمد طاهر ثابت لخوا د حاضرینو په حضور کې مناقشه تر سره شوه.
د غونډې په پای کې د پوهنتون علمي چارو مرستیال پوهنوال دوکتور عبدالواحد لیاقت د شرعیاتو پوهنځي استادانو فارغ محصل ته د دې ستر علمي بریا مبارکي وړاندې کړه او غونډه د اختتامیه دعاء سره پای ته ورسېده.
شنبه: ۸/۱/۱۴۰۵ـــــ۱۰/۱۰/۱۴۴۷
د نشراتو او عامه اړیکو آمریت
