د زړه دندې د اسلامي شریعت او طب له نظره تر عنوان لاندې علمي سیمینار ترسره شو

د زړه دندې د اسلامي شریعت او طب له نظره تر عنوان لاندې علمي سیمینار ترسره شو.
نن دوشنبه د ۱۴۰۴ هـ.ش کال د مرغومي میاشتې له لومړۍ نېټې سره برابره ده، د افغان نړیوال اسلامي پوهنتون د علمي چارو معاونیت په همکارۍ د شرعیاتو پوهنځي د فقه او قانون څانګې له لوري د زړه دندې د اسلامي شریعت او طب له نظره تر عنوان لاندې یو ورځنی علمي سیمینار ترسره شو.
په دغه علمي سیمینار کې د پوهنتون د بېلابېلو پوهنځیو رئیسانو، استادانو او علمي شخصیتونو ګډون درلود. د سیمینار پیل د علمي چارو مرستیال پوهنوال دوکتور عبدالواحد لیاقت د پرانستې وینا سره وشو، چې پکې یې د ګډونوالو هرکلي تر څنګ د زړه د ارزښت او د انساني ژوند لپاره د هغه د حیاتي رول په اړه لنډې څرګندونې وکړې.
یاد سیمینار په دوه علمي برخو کې تنظیم شوی و:
لومړۍ برخه د شرعیاتو پوهنځي استاد دوکتور محمد یونس ابراهیمي، د زړه دندې د اسلامي شریعت له نظره وڅېړلې. نوموړي د قرآنکریم او نبوی سنتو له مخې د زړه د معنوي، روحاني او اخلاقي ارزښت په اړه مفصلې علمي خبرې وکړې.
ورپسې د الحیات روغتون د زړه څانګې مسؤل ډاکټر خالد راشد د زړه ارزښت او دندو ته د معاصر طب له زاویې بشپړ معلومات ورکړه. هغه څرګنده کړه، چې زړه د انسان له ټولو غړو سره مستقیمه اړیکه لري او د بدن د سالم فعالیت بنسټ جوړوي.
په پای کې د ګډونوالو لپاره د پوښتنو او ځوابونو برخه ځانګړې شوې وه، چې پکې ګډونوالو خپلې پوښتنې مطرح کړې او د سیمینار وړاندې کوونکو ورته قانع کوونکي ځوابونه ورکړل.
یادونه باید وشي، چې د افغان نړیوال اسلامي پوهنتون اداره تل هڅه کوي چې دا ډول علمي او تخصصي سیمینارونو له لارې نه یوازې خپلو استادانو او محصلینو ته علمي خدمتونه وړاندې کړي، بلکې عامه پوهاوي ته هم پراختیا ورکړي.
د نشراتو او عامه اړیکو آمریت